Pro s’agabu de su seminàriu “Su Sardu in Tres Paràulas”, chenàbura su 12 de santugaine, sos istudentes de s’assòtziu Su Majolu ordinzant un’atopu pro faeddare de s’imparu in sardu in s’Universidade e de sa formatzione de sos mastros e de sos professores de Limba Sarda.
In su mese de Aprile de ocannu l’amus zutu a su Retore Attilio Mastino una petitzione firmada dae milli istudentes de s’Universidade de Tàtari, pedende chi ponzan duos cursos de làurea pro formare sos mastros e sos professores e limba sarda (petitzione chi a pustis amus zutu fintzas a s’Assessore Regionale pro s’Istrutzione Pùblica Sergio Milia e amus mandadu fintzas a su Retore de Casteddu, a su Cussizu Regionale e a su Presidente de sa Regione).
Oje semus galu isetende chi s’Universidade nos torret una risposta. Pro custu mutimus a totus sos istudentes e a sos professores de s’Universidade pro nos cunfrontare subra ‘e custas chistiones de importu mannu in un’arrejonada aberta a totus. Isperamus chi benzant fintzas sos mèdia.
S’atopu at a esser in s’Aula Umanìstica de sa ex facultade de Lìteras, via Zanfarino 62, Tàtari, a sas bator de bortaedie, chenàbura su 12 de santugaine.
Sos istudentes de Su Majolu (12/10/2012 assemblea organizzata dal gruppo studentesco su majolu all’Università di Sassari.)